Mapi Quintana presenta “Música pa tornar páxaros” nel Centro Niemeyer

 

• La compositora y cantante ḷḷeniza va tomar l’Auditoriu el vienres 9 de xunu a les 20:00 h col so últimu discu, “Música pa tornar páxaros”, creación que representó a Asturies na edición 2022 del Festival Intercélticu de Lorient
• Esti conciertu, entamáu pola Dirección Xeneral de Política Llingüística del Principáu d’Asturies, tien entrada de baldre depués de retirar invitaciones dende güei, miércoles 31 de mayu a les 12:00 de la mañana

 

Avilés, 31 de mayu del 2023. La compositora y cantante ḷḷeniza Mapi Quintana llega al Auditoriu del Centru Niemeyer pa presentar la so última creación, el discu “Música pa tornar páxaros”, con un conciertu que se va facer el vienres 9 de mayu a les 20:00 h. La entrada ye de baldre, depués de retirar les invitaciones na recepción del Centru Niemeyer y nes taquilles de Llaboral Ciudá de la Cultura (Xixón) y CITPA (Uviéu).

Esti espectáculu musical, entamáu pola Dirección Xeneral de Política Llingüística en collaboración col Ministeriu de Cultura y Deportes, contién los temes orixinales encargaos pola Conseyería de Cultura a Mapi Quintana pa inaugurar la programación d’Asturies na edición 2022 del Festival Intercélticu de Lorient (FIL).

Concebíu como un conciertu al usu, inspiráu como homenaxe al músicu fallecíu de Llan de Cubel Elías García, esti eventu pon n’escena ocho canciones, les más d’elles escrites n’asturianu, anque tamién hai una creación en castellanu de la compositora y panderetera vallisoletana Cris Zagaleja.

A lo llargo de más d’una hora de conciertu, la voz y l’harmonía tienen tol protagonismu, con un repertoriu de melodíes asturianes a trés voces capaces a treslladar al públicu a estétiques muncho más lloñe. Ello gracies a que la fonte d’inspiración más evidente ye la música impresionista y el jazz.

Y anque’l repertoriu contién sobre manera música orixinal fecha pa esta cita, tamién va haber espaciu pa la improvisación, tanto solista como en grupu. Amás, Mapi Quintana quixo incluyir y facer gala de dellos cantares tradicionales recoyíos nel so conceyu natal, Ḷḷena, p’asina poner un pedazu de los sos oríxenes na representación.

Mención aparte merez l’arte visual de Marina Durany, con evidente importancia nel conciertu, al ser l’elementu que lu convierte nun verdaderu espectáculu. Concebíu cola mira de completar estéticamente la representación, acabó por ser ferramienta clave p’ayudar a comunicar la temática de los cantares. Una puesta en escena que ta perfectamente sincronizada, porque lo qu’apaez na pantalla ye lo que l’espectador va sintiendo, dando forma a una proyección visual de toles emociones que guarden les composiciones.

El conciertu va tar protagonizáu por Mapi Quintana a la voz y al contrabaxu, César Latorre al pianu, Sonia Cartón a la voz y sintetizador, María Sanmiguel a la voz y al violín, Thomas Welvaadt a la trompeta y Juanjo Díaz a la percusión.

Les invitaciones pa “Música pa tornar páxaros” van tar disponibles dende güei, miércoles 31 de mayu, a les 12:00 del mediudía na taquilla del Centru Niemeyer y nes recepciones de Llaboral Ciudá de la Cultura (Xixón) y CITPA (Uviéu).